لە سەرەتای بەھارەوە
کە مەمکی کانیاوی بن چیا
ژیان دەکاتە دەم گوڵاڵەی لا نزارەوە
خاتوونێ دێت......

کە شەختە ڕادەماڵێ تاو
بە گۆرانیی عەشق و ئەوین
باوەشی کەژ گەورە دەبێ
بەڵێن دەدا چرۆی دڵدار
بە ڕەگ لە ناوەوەی زەوین
خاتوونێ دێت......

ڕۆژی دەم کەل
بە سیلەی چاو
کپیی تاریکی کەل دەکا
خاتوونێ دێت......

خاتوونێ دێت
دەبێ بەیەک لە پرژەکانی
خۆری مەستی خاکەلێو
بە بیست و دوو تاڵە ئەوینی ئاگرین
سەرما لە جەستەی پیاوێکی
کەسیرە دوور دەخاتەوە
ئۆخژنی دێنێتەوە بەر
شادی دەپرژێنێتە سەر زەوین

/ئەنوەر ھوژەبری/